شعری از استاد شهریار در رثای سرور و سالار شهیدان
حسینین نوحه سین (دلریش) یازندا
مسلمان سهلدیر کی کافر آغلار
کور اولموش گؤزلرین قان توتدو شمرین
کی گؤرسون اؤز الینده خنجر آغلار
حسینین کؤینگی زهرا الینده
چکر قییها قیامت، محشر آغلار
آتاندا حرمله اوخ کربلا ده
گؤره یدین دشمن آغلار، لشگر آغلار
قوجاغیندا، گؤره یدین ام لیلا
آلیب نعش علی اکبر آغلار
رباب، نیسگیل دؤشونده سود گؤرنده
علی اصغری یاد ائیلر آغلار
باشیندا کاکل اکبر هواسی
یئل آغلار، سونبول آغلار، عنبر آغلار
یازاندا آل طاها نوحه سین من
قلم گؤردوم سیزیلدار، دفتر آغلار
علی، شق القمر، محراب تیلیب قان
قولاق وئر، مسجد اوخشار منبر آغلار
علی دن (شهریار)، سن بیر اشاره
قوجاقلار قبری، مالک اشتر آغلار